Autism Spectrum Disorder ( ஆட்டிசம் ஸ்பெக்ட்ரம் கோளாறுகள் ) - ASD என்பது குழந்தையின் மூளை வளர்ச்சி, தொடர்புத்திறன், சமூக பழக்கம் மற்றும் நடத்தை ஆகியவற்றை பாதிக்கும் ஒரு நரம்பியல் மற்றும் வளர்ச்சி தொடர்பான நிலையாகும்.
இது ஒரு மனநோய் அல்ல. மாறாக, குழந்தை உலகத்தை உணரும் மற்றும் அதற்கு பதிலளிக்கும் விதத்தில் காணப்படும் வளர்ச்சி வேறுபாடாகும்.
ASD கொண்ட குழந்தைகள் ஒவ்வொருவரும் தனித்துவமானவர்கள். சில குழந்தைகள் பேசுவதில் தாமதம் காணப்படலாம்; சிலர் அதிக அறிவுத்திறன் கொண்டிருந்தாலும் சமூக தொடர்புகளில் சிரமப்படலாம். சிலர் ஒலி, ஒளி அல்லது தொடுதல் போன்ற உணர்வுகளுக்கு அதிக உணர்திறன் கொண்டிருக்கலாம்.
ASD என்றால் என்ன?
ASD உள்ள குழந்தைகளில் பொதுவாக காணப்படும் அம்சங்கள்:
- பேச்சு மற்றும் மொழி வளர்ச்சியில் தாமதம்
- கண் தொடர்பு குறைவு
- மற்றவர்களுடன் பழகுவதில் சிரமம்
- ஒரே செயலை மீண்டும் மீண்டும் செய்வது
- குறிப்பிட்ட பொருட்களில் அதிக ஈடுபாடு
- ஒலி, ஒளி, வாசனை அல்லது தொடுதல்களுக்கு அதிக உணர்வு
- மாற்றங்களை ஏற்க சிரமம்
ASD வகைகள்
ஆட்டிசம் ஸ்பெக்ட்ரத்தில் அடங்கும் நிலைகள்:
1. Autism (ஆட்டிசம்) : சமூக தொடர்பு, பேச்சு மற்றும் நடத்தை மாற்றங்களில் சவால்கள் காணப்படும்.
2. Asperger Syndrome (அஸ்பெர்ஜர் சிண்ட்ரோம்) : மொழி வளர்ச்சி சாதாரணமாக இருந்தாலும் சமூக தொடர்புகளில் சிரமம் காணப்படும்.
3. Childhood Disintegrative Disorder : சாதாரண வளர்ச்சிக்குப் பிறகு சில திறன்கள் இழக்கப்படுவது.
4. Rett Syndrome : பெரும்பாலும் பெண்களில் காணப்படும் நரம்பியல் வளர்ச்சி கோளாறு.
ASD ஏற்படும் காரணங்கள்
ASD ஏற்படும் சரியான காரணம் இன்னும் முழுமையாக கண்டறியப்படவில்லை. ஆய்வுகள் கீழ்க்கண்ட காரணிகள் தொடர்புடையதாக இருக்கலாம் என்று கூறுகின்றன.
மரபியல் காரணிகள் (Genetics): குடும்பத்தில் மரபாக வரும் சில ஜீன் மாற்றங்கள் மூளை வளர்ச்சியை பாதித்து ASD ஏற்பட வாய்ப்பை அதிகரிக்கலாம்.
மூளை இரசாயன மாற்றங்கள்: மூளையில் தகவல் பரிமாற்றம் செய்யும் இரசாயனங்களின் சமநிலை மாற்றம் தொடர்பு, நடத்தை மற்றும் உணர்ச்சி வெளிப்பாட்டை பாதிக்கலாம்.
நரம்பியல் வளர்ச்சி வேறுபாடுகள்: மூளை வளர்ச்சி மற்றும் நரம்பு இணைப்புகள் சாதாரண வளர்ச்சியிலிருந்து வேறுபடுவதால் சமூக மற்றும் மொழித் திறன்களில் சவால்கள் ஏற்படலாம்.
கர்ப்பகால மற்றும் பிறப்புக்கால காரணிகள்: கர்ப்பகால உடல்நிலை, ஊட்டச்சத்து, தொற்றுகள் அல்லது பிறப்பின் போது ஏற்படும் சில சிக்கல்கள் கூட தாக்கம் செலுத்தக்கூடும்.
ASD-இன் ஆரம்ப அறிகுறிகள்
பெற்றோர் குழந்தையின் ஆரம்ப வயதிலேயே சில அறிகுறிகளை கவனிக்கலாம்.
- பெயர் அழைத்தால் பதில் தராமை
- பேசுவதில் தாமதம்
- தனியாக இருக்க விருப்பம்
- கண் தொடர்பு குறைவு
- சமூக விளையாட்டில் ஈடுபடாமை
- தூக்க சவால்கள்
- அதிக கோபம் அல்லது அச்சம்
- ஒரே செயலை மீண்டும் செய்வது
ஆரம்ப கண்டறிதலின் முக்கியத்துவம்
ASD-ஐ ஆரம்ப கட்டத்திலேயே கண்டறிதல் மிகவும் முக்கியமானது.
ஏனெனில் ஆரம்ப சிகிச்சை:
- மொழி வளர்ச்சியை மேம்படுத்தும்
- சமூக தொடர்புகளை வளர்க்கும்
- நடத்தை சவால்களை குறைக்கும்
- பள்ளி தயாரிப்பை மேம்படுத்தும்
- சுயநிறைவை அதிகரிக்கும்
ASD குழந்தைகளுக்கான சிகிச்சைகள்
1. Speech Therapy (பேச்சு சிகிச்சை)
பேச்சு சிகிச்சை என்பது ASD கொண்ட குழந்தைகளின் தொடர்பு மற்றும் மொழித் திறன்களை மேம்படுத்த உதவும் முக்கியமான சிகிச்சையாகும். சில குழந்தைகள் பேசுவதில் தாமதம் காணப்படலாம் அல்லது தங்களது தேவைகளை சரியாக வெளிப்படுத்த முடியாமல் இருக்கலாம். இந்த சிகிச்சையின் மூலம் அவர்கள் சொற்களைப் பயன்படுத்துவது, வாக்கியங்களை அமைப்பது, கண் தொடர்புடன் பேசுவது மற்றும் மற்றவர்களுடன் உரையாடுவது போன்ற திறன்களை மெதுவாக கற்றுக்கொள்கிறார்கள். மேலும், சமூக சூழலில் எவ்வாறு பேச வேண்டும் என்பதையும் இந்த சிகிச்சை கற்பிக்கிறது.
2. Occupational Therapy (தொழில் சிகிச்சை)
தொழில் சிகிச்சை குழந்தையின் அன்றாட வாழ்க்கைத் திறன்களை மேம்படுத்துவதில் கவனம் செலுத்துகிறது. உடை அணிதல், உணவு உண்ணுதல், பல் துலக்குதல், எழுதுதல் போன்ற தினசரி செயல்களை குழந்தை தன்னால் சுயமாக செய்ய உதவுகிறது. இதன் மூலம் கை-கண் ஒருங்கிணைப்பு, சிறிய தசை இயக்கங்கள் மற்றும் கவன திறன்களும் மேம்படுகின்றன. இந்த சிகிச்சை குழந்தையின் தன்னம்பிக்கையை வளர்த்து, தினசரி வாழ்க்கையில் சுயநிறைவை அதிகரிக்க உதவுகிறது.
3. Physical Therapy (உடல் சிகிச்சை)
உடல் சிகிச்சை குழந்தையின் உடல் இயக்க வளர்ச்சியை மேம்படுத்த உதவுகிறது. சில ASD குழந்தைகளுக்கு சமநிலை பேணுதல், ஓடுதல், குதித்தல் அல்லது உடலை ஒருங்கிணைத்து பயன்படுத்துதல் போன்ற செயல்களில் சிரமம் இருக்கலாம். இந்த சிகிச்சையின் மூலம் தசை வலிமை, உடல் சமநிலை, இயக்க கட்டுப்பாடு மற்றும் ஒருங்கிணைப்பு திறன்கள் மேம்படுகின்றன. விளையாட்டு மற்றும் உடற்பயிற்சி நடவடிக்கைகள் மூலம் குழந்தையின் உடல் திறன்கள் வளர்க்கப்படுகின்றன.
4. Social Skills Training (சமூகத் திறன் பயிற்சி)
சமூகத் திறன் பயிற்சி என்பது குழந்தைகள் மற்றவர்களுடன் நல்ல உறவை உருவாக்க உதவும் ஒரு முக்கியமான பயிற்சியாகும். ASD கொண்ட குழந்தைகளுக்கு நண்பர்களுடன் பழகுவது, மாறி மாறி பேசுவது, உணர்ச்சிகளை புரிந்துகொள்வது மற்றும் சமூக விதிகளை பின்பற்றுவது போன்றவற்றில் சவால்கள் இருக்கலாம். இந்த பயிற்சியின் மூலம் அவர்கள் சமூக சூழலில் எப்படி நடந்து கொள்ள வேண்டும், எவ்வாறு உரையாடலை தொடங்க வேண்டும் மற்றும் குழுவில் இணைந்து செயல்பட வேண்டும் என்பதைக் கற்றுக்கொள்கிறார்கள். இது குழந்தையின் சமூக நம்பிக்கையையும் உறவுத் திறன்களையும் மேம்படுத்துகிறது.
ஆட்டிசம் ஸ்பெக்ட்ரம் கோளாறு (ASD) கொண்ட குழந்தைகளின் ஆதரவு முறைகள் ?
ஆட்டிசம் ஸ்பெக்ட்ரம் கோளாறு (Autism Spectrum Disorder) கொண்ட குழந்தைகளில் உணர்வு செயலாக்கம், இயக்க ஒருங்கிணைப்பு, நுண் இயக்கத் திறன்கள் மற்றும் தினசரி வாழ்க்கை திறன்களில் சில சவால்கள் காணப்படலாம். சரியான சூழல் அமைப்பு, படிப்படியான கற்றல் முறைகள் மற்றும் காட்சி வழிகாட்டுதல்கள் மூலம் இவர்களின் வளர்ச்சியை மேம்படுத்த முடியும். ஒலி, தொடுதல் மற்றும் பார்வை உணர்வுகளை சரியாக கையாளுதல் குழந்தையின் கவனம், நடத்தை மற்றும் சுயநிறைவை அதிகரிக்க உதவுகிறது.
1. உணர்வு செயலாக்கம் (Sensory Processing)
1.1 ஒலி உணர்வு (Auditory Sensory) : ASD குழந்தைகளில் ஒலி உணர்வு மிகவும் சென்சிடிவாக இருக்கும். சாதாரண சத்தங்களும் அவர்களுக்கு அதிகமாகவும் அச்சமாகவும் உணரப்படலாம். இதனால் அவர்கள் பதட்டம், அழுதல் அல்லது காதுகளை மூடிக்கொள்வது போன்ற நடத்தைகளை காட்டலாம். Noise-cancelling headphones, அமைதியான சூழல் மற்றும் மெதுவான குரல் பயன்பாடு அவர்களுக்கு பாதுகாப்பு உணர்வை வழங்கும்.
1.2 தொடு உணர்வு (Tactile Sensory) : ASD உள்ள சில குழந்தைகளுக்கு தொடுதலில் சவால்கள் காணப்படலாம். அவர்கள் சில நேரங்களில் தொடுதலை விரும்பாமல் இருக்கலாம் அல்லது அதிகமாக தொட விரும்பலாம். இதை சமநிலைப்படுத்த Deep pressure, weighted blanket, compression clothing மற்றும் மென்மையான மசாஜ் போன்ற உதவிகள் பயனுள்ளதாக இருக்கும்.
1.3 பார்வை உணர்வு (Visual Processing) : சில குழந்தைகள் அதிக ஒளி, மினுமினுக்கும் விளக்குகள் அல்லது குழப்பமான சூழலால் பாதிக்கப்படலாம். இதனால் அவர்கள் கவலை அல்லது அசௌகரியம் உணரலாம். எளிய மற்றும் அமைதியான சூழல், குறைந்த அலங்காரம் மற்றும் காட்சி அட்டவணைகள் போன்றவை உதவியாக இருக்கும்.
2. ஒருங்கிணைப்பு திறன்கள் (Coordination Skills)
ஒருங்கிணைப்பு திறன்கள் குழந்தையின் உடல் இயக்கங்களை ஒரே நேரத்தில் செயல்படுத்த உதவுகின்றன. இது கண்–கை ஒருங்கிணைப்பு மற்றும் இருதரப்பு ஒருங்கிணைப்பு என இரண்டு முக்கிய பகுதிகளாக பிரிக்கப்படுகிறது.
2.1 கண்–கை ஒருங்கிணைப்பு (Eye-Hand Coordination) : பந்து உருட்டுதல், கட்டங்கள் அடுக்குதல், பலூன் விளையாட்டு, Figure eight பயிற்சி மற்றும் வாகன விளையாட்டுகள் போன்ற செயல்பாடுகள் இந்த திறனை வளர்க்க உதவுகின்றன.
2.2 இருதரப்பு ஒருங்கிணைப்பு (Bilateral Coordination) : இது உடலின் இரு பக்கங்களையும் ஒருங்கிணைத்து செயல்பட உதவுகிறது. ஓடுதல், குதித்தல், காலணி கட்டுதல், கத்தரிக்கோல் பயன்படுத்துதல் போன்றவை உதாரணங்கள். Jumping jacks, bead threading, ribbon tying மற்றும் paper tearing போன்ற பயிற்சிகள் இதை மேம்படுத்தும்.
3. நுண் இயக்கத் திறன்கள் (Fine Motor Skills)
நுண் இயக்கத் திறன்கள் எழுதுதல், பொத்தான் போடுதல், கரண்டி பயன்படுத்துதல் மற்றும் பக்கங்கள் திருப்புதல் போன்ற சிறிய கை இயக்கங்களை உள்ளடக்கியவை. Putty அல்லது clay விளையாட்டு, hole punch வேலை, மாவு அல்லது பட்டாணி எடுப்பது மற்றும் cotton ball grip போன்ற செயல்பாடுகள் இதை வளர்க்க உதவுகின்றன.
4. தினசரி வாழ்க்கை திறன்கள் (Daily Living Skills)
தினசரி வாழ்க்கை திறன்கள் குழந்தையின் சுயசார்பு வளர்ச்சிக்கு முக்கியமானவை. இதில் self-care, உணவு நேர திறன்கள், உடை அணிதல் மற்றும் சுகாதார பழக்கங்கள் அடங்கும்.
4.1 Self-care திறன்கள் : உடை அணிதல், பல் துலக்குதல், கை கழுவுதல், குளித்தல் மற்றும் உணவு உண்ணுதல் போன்ற அடிப்படை செயல்கள் இதில் அடங்கும்.
4.2 உணவு நேர திறன்கள் (Mealtime) : சில குழந்தைகள் உணவு தேர்வில் சிரமம் காணலாம் அல்லது ஒரே உணவை மட்டுமே விரும்பலாம். புதிய உணவுகளை மெதுவாக அறிமுகப்படுத்துதல், சிறிய அளவில் தொடங்குதல், குடும்பமாக உணவருந்துதல் மற்றும் டைமர் பயன்படுத்துதல் உதவியாக இருக்கும்.
4.3 உடை அணிதல் (Dressing Skills) : உடை அணிதலை படிப்படியாக கற்றுக்கொடுக்கலாம். முதலில் தலை வைப்பது, பிறகு கை ஸ்லீவுக்குள் செலுத்துவது மற்றும் இறுதியாக ஆடை இழுத்தல் போன்ற கட்டங்களாக கற்றல் வழங்கலாம்.
4.4 கழிப்பறை மற்றும் சுகாதாரம். : Flush பயன்படுத்துதல், கை கழுவுதல், பல் துலக்குதல் மற்றும் நகம் வெட்டுதல் போன்ற பழக்கங்கள் இதில் அடங்கும். காட்சி வழிகாட்டுதல், routine பாடல்கள் மற்றும் அழுத்தம் இல்லாத கற்றல் முறைகள் சிறந்தவை.
5. காட்சி அட்டவணைகள் (Visual Schedules)
காட்சி அட்டவணைகள் படங்கள், சின்னங்கள் மற்றும் வார்த்தைகள் மூலம் தினசரி செயல்களை காட்டுகின்றன. இதில் “Done” பகுதி இருப்பதால் குழந்தைகள் செயல்களை முடித்ததை புரிந்துகொள்கிறார்கள். இது பதட்டத்தை குறைத்து, எதிர்பார்ப்பை தெளிவாக்கி, சுயசார்பை அதிகரிக்க உதவுகிறது.
ASD குழந்தைகளின் வளர்ச்சியில் விளையாடு, பள்ளி மற்றும் சமூகச் சூழல்கள் போன்றவற்றின் முக்கிய பங்கு ?
ASD குழந்தைகளுக்கு பள்ளி சூழல் சில நேரங்களில் சவாலாக இருக்கலாம். அதிக சத்தம், கூட்டம், ஒளி, வாசனை மற்றும் மாற்றங்கள் அவர்களை பாதிக்கலாம். ஆசிரியர்கள் பாதுகாப்பான இடம் வழங்குதல், காட்சி அட்டவணைகள் பயன்படுத்துதல் மற்றும் குறுகிய அறிவுறுத்தல்கள் வழங்குதல் மூலம் உதவ முடியும்.
உணவகம் அல்லது திரைப்படம் போன்ற இடங்களுக்கு செல்லும் முன் திட்டமிடுதல் அவசியம். பிடித்த உணவை தேர்வு செய்தல், சத்தக் கட்டுப்பாடு மற்றும் noise-cancelling headphones போன்றவை உதவியாக இருக்கும்.
விளையாட்டு குழந்தையின் வளர்ச்சியில் மிக முக்கியமானது. இதன் மூலம் சமூக திறன், கற்பனை, உடல் இயக்கம் மற்றும் உணர்ச்சி வெளிப்பாடு போன்றவை வளர்கின்றன. ASD குழந்தைகள் சில நேரங்களில் தனியாக விளையாட விரும்பலாம். பெற்றோர் அவர்களை கட்டாயப்படுத்தாமல், குழந்தையின் உலகில் மெதுவாக இணைந்து அருகில் அமர்ந்து ஆதரவு அளிக்க வேண்டும். இரண்டு குழந்தைகள் அருகில் இருந்தாலும் நேரடி தொடர்பில்லாமல் விளையாடுவது Parallel Play ஆகும். இது சமூக நெருக்கம், கவனிப்பு திறன் மற்றும் பின்னர் உருவாகும் நட்பை வளர்க்க உதவுகிறது. பகிர்ந்து விளையாடும் செயல்கள் குழந்தைகளுக்கு முக்கியமானவை. பந்து உருட்டுதல், Turn-taking விளையாட்டுகள், Catch games மற்றும் Ring toss போன்றவை சமூக தொடர்பை மேம்படுத்துகின்றன.
ASD குழந்தையை வளர்க்கும் பெற்றோர் மற்றும் குடும்ப ஆதரவு ?
ASD குழந்தையை வளர்ப்பது ஒரு நீண்டகாலமும், பொறுமையும் தேவைப்படும் பயணமாகும். இந்த செயல்முறையில் பெற்றோர் பல்வேறு உணர்ச்சி மாற்றங்களை அனுபவிக்கலாம். ஆரம்பத்தில் குழந்தையின் நிலை பற்றி அறிந்ததும் பயம், குழப்பம், மனஅழுத்தம், சோர்வு மற்றும் எதிர்காலம் பற்றிய அதிகமான கவலை போன்ற உணர்வுகள் ஏற்படுவது இயல்பு. சில நேரங்களில் “நாம் என்ன செய்ய வேண்டும்?” என்ற uncertainty கூட இருக்கும்.
இதற்கிடையில் பல பெற்றோர்கள் துக்க நிலைகள் (Grief Process) வழியாகவும் செல்கின்றனர். முதலில் மறுப்பு (Denial) – “இது தவறு இருக்கலாம்” என்று எண்ணுதல். அதன் பின்னர் கோபம் (Anger) – நிலையை ஏற்றுக்கொள்ள முடியாத உணர்வு. அடுத்து பேரம் பேசுதல் (Bargaining) – “இதை சரி செய்ய ஏதாவது வழி இருக்குமா?” என்று தேடுதல். அதற்குப் பிறகு மனச்சோர்வு (Depression) – சோர்வு, நம்பிக்கை குறைதல் போன்ற உணர்வுகள். இறுதியில் ஏற்றுக்கொள்ளுதல் (Acceptance) – குழந்தையின் நிலையை புரிந்து கொண்டு, அவருக்கு தேவையான ஆதரவை வழங்க ஆரம்பிக்கும் நிலை.
இந்த எல்லா நிலைகளும் ஒரு இயல்பான மனவியல் செயல்முறை ஆகும். சரியான ஆதரவு, தகவல் மற்றும் குடும்ப ஒத்துழைப்பு பெற்றோருக்கு இந்த பயணத்தை சமாளிக்க மிகவும் உதவுகிறது.
ASD குழந்தைக்கு உதவும் நிபுணர்கள்:
- Occupational Therapist
- Speech Therapist
- Psychologist
- Special Educator
- Physical Therapist
- Behaviour Therapist
ASD குழந்தைகளுக்கான முக்கிய கற்பித்தல் முறைகள்
செய்ய வேண்டியவை
✔ அதிகமாக காட்டுங்கள்
✔ குறைவாக பேசுங்கள்
✔ காட்சி உதவிகள் பயன்படுத்துங்கள்
✔ சிறிய படிகளாக கற்பிக்கவும்
✔ தினசரி பயிற்சி அளிக்கவும்
✔ சிறிய வெற்றிகளையும் கொண்டாடுங்கள்
தவிர்க்க வேண்டியவை
✘ குழந்தையை ஒப்பிட வேண்டாம்
✘ அதிக அழுத்தம் கொடுக்க வேண்டாம்
✘ கட்டாயப்படுத்த வேண்டாம்
✘ தோல்வியை சுட்டிக்காட்ட வேண்டாம்
✘ அதிக திரை நேரம் தவிர்க்கவும்
ASD கொண்ட குழந்தைகளுக்கு மிக முக்கியமானவை
பாதுகாப்பு உணர்வு, ஏற்றுக்கொள்ளப்படுதல், பொறுமை, அன்பான வழிகாட்டுதல், முன்னறிவிப்பு மற்றும் ஒழுங்கான தினசரி நடைமுறை ஆகியவையாகும். இவை குழந்தைக்கு நம்பிக்கை, நிலைத்தன்மை மற்றும் சுயநம்பிக்கை வளர உதவுகின்றன.
